ກອງປະຊຸມປຶກສາຫາລື ແລະ ເກັບກຳຂໍ້ມູນ ໃນການສ້າງນະໂຍບາຍ ຮອງຮັບການພັດທະນາລະບົບລັດດິຈິຕອນ ໃນ ສປປ ລາວ 2022

06/07/2022

ກອງປະຊຸມປຶກສາຫາລື ແລະ ເກັບກຳຂໍ້ມູນ ໃນການສ້າງນະໂຍບາຍ ຮອງຮັບການພັດທະນາລະບົບລັດດິຈິຕອນ ໃນ ສປປ ລາວ 2022

 ໃນຕອນເຊົ້າ ຂອງວັນທີ 06 ກໍລະກົດ 2022 ທີ່ ໂຮງແຮມ ຄລາວພລາຊາ, ສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ ໄດ້ຮ່ວມກັບ ສະຖາບັນການພັດທະນາ ຂອງ ສ.ເກົາຫຼີ ຫຼື Korea Development Institute (KDI) ຈັດກອງປະຊຸມປຶກສາຫາລື ແລະ ເກັບກຳຂໍ້ມູນ ເພື່ອສ້າງ ແລະ ປັບປຸງນະໂຍບາຍ ຮອງຮັບການພັດທະນາລະບົບການບໍລິຫານ ແລະ ບໍລິການລັດດິຈິຕອນ ໃນ ສປປ ລາວ ຂຶ້ນຢ່າງເປັນທາງການ, ໂດຍການເປັນປະທານຮ່ວມ ຂອງ ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ປອ Yang-Ho-Ahn (ຢັງໂຮອານ) ທີ່ປຶກສາອາວຸໂສ KDI, ອະດີດຮອງລັດຖະມົນຕີກະຊວງພາຍໃນ ແລະ ຄວາມປອດໄພ ຂອງ ສ.ເກົາຫຼີ, ມີຜູ້ເຂົ້າຮ່ວມຈາກກະຊວງ/ອົງການທຽບເທົ່າ ທີ່ກ່ຽວຂ້ອງ ເຂົ້າຮ່ວມທັງໝົດ ຈຳນວນ 40 ທ່ານ.

ໃນກອງປະຊຸມດັ່ງກ່າວ, ທ່ານ ປອ ທະວີສັກ ມະໂນທັມ ຫົວໜ້າສູນບໍລິຫານລັດດິຈິຕອນ ໄດ້ນໍາສະເໜີພາບລວມຂອງໂຄງການແລກປ່ຽນຄວາມຮູ້ ຫຼື Knowledge Sharing Program (KSP) ທີ່ໄດ້ຮັບການຊ່ວຍເຫຼືອຈາກ ສ.ເກົາຫຼີ ສົກປີ 2021-2022 ພ້ອມທັງ ຈຸດປະສົງ, ເປົ້າໝາຍ ແລະ ແຜນວຽກ ຂອງໂຄງການດັ່ງກ່າວ. ພ້ອມກັນນີ້, ທາງ KDI ກໍ່ໄດ້ນຳສະເໜີ ຂໍ້ມູນທີ່ເກັບກຳໄດ້ເບື້ອງຕົ້ນ ແລະ ປຶກສາຫາລື ຮັບຄຳຄິດເຫັນ ຈາກພາກສ່ວນກ່ຽວຂ້ອງ ໃນວຽກງານນະໂຍບາຍ ແລະ ແຜນການຫັນເປັນທັນສະໄໝ ທາງດ້ານດິຈິຕອນ ຂອງແຕ່ລະຂະແໜງການ ເພື່ອສັງລວມ ແລະຄົ້ນຄວ້າສ້າງເປັນລາຍງານ ແຜນນະໂຍບາຍໃນການຫັນເປັນລັດຖະບານດິຈິຕອນ ຂອງ ສປປ ລາວ.

ໂຄງການ KSP ສົກປີ 2021-2022 ນີ້ ຈະປະກອບມີ 3 ວຽກຫຼັກຄື: 1) ປະເມີນຄືນລະບົບໂຄງສ້າງ, ໂຄງຮ່າງ, ລະບົບການນໍາເນີນການ ຂອງລັດຖະບານດິຈິຕອນ ໃນ ສປປ ລາວ. 2) ສຶກສາແນວທາງເພື່ອປັບປຸງ ຫຼື ສ້າງໃໝ່ທາງດ້ານນະໂຍບາຍທີ່ຈໍາເປັນ ເພື່ອຫັນເປັນລັດຖະບານດິຈິຕອນ ຢ່າງມີປະສິດທິ ພາບ. 3) ຊ່ວຍພັດທະນາບຸກຄະລາກອນໃຫ້ມີຄວາມຮູ້ ແລະ ມີພື້ນຖານທາງດ້ານລັດຖະບານດິຈິຕອນ ຫຼາຍຂຶ້ນ. ເມື່ອສຳເລັດໂຄງການ, ສປປ ລາວ ຈະມີບ່ອນອີງ ໃນການພັດທະນາ ດ້ານນະໂຍບາຍ ແລະ ໂຄງສ້າງ ເພື່ອຫັນເປັນລັດຖະບານທັນສະໄໝ ດ້ານດິຈິຕອນ ໃຫ້ມີຄວາມວ່ອງໄວ, ໂປ່ງໃສ ແລະ ມີປະສິດທິພາບສູງ.

ຂ່າວໂດຍ: ສູນບໍລິຫານລັດດິຈິຕອນ

 

 

 

 

ວາ​ລະ​ສານ ໄອ​ຊີ​ທີ
ໜັງສືພິມ
ໜັງສືແຈ້ງເຊີນປະມູນ
ໜັງສືແຈ້ງເຊີນປະມູນ