2022 /04/11 ກະຊວງ ເຕັກໂນໂລຊີ ແລະ ການສື່ສານ ແລະ ບໍລິສັດ ສິຣິຈະເລີນ ເຊັນສັນຍາ (Memorandum of Agreement -MOA)

12/04/2022

 2022 /04/11 ກະຊວງ ເຕັກໂນໂລຊີ ແລະ ການສື່ສານ ແລະ ບໍລິສັດ ສິຣິຈະເລີນ ເຊັນສັນຍາ (Memorandum of Agreement -MOA)

      ໃນວັນທີ 11 ເມສາ 2022 ຜ່ານມານີ້, ໄດ້ມີພິທີເປີດນຳໃຊ້ ແອັບລາວແຊັດ (LoudChat) ຂື້ນຢ່າງເປັນທາງການທີ່ໂຮງແຮມແລນມາກ ພາຍໃຕ້ການເປັນປະທານຮ່ວມເປີດງານໂດຍ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແລະ ທ່ານ ບັນດິດ ສຈ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ(ກະຊວງ ຕສ) ໂດຍມີ ຮອງລັດຖະມົນຕີ, ຫົວໜ້າຫ້ອງການ ແລະ ຫົວໜ້າກົມ/ທຽບເທົ່າ ພາຍໃນກະຊວງ ຕສ ແລະ ແຂກຖືກເຊີນຈາກພາຍນອກເຂົ້າຮ່ວມໃນພິທີດັ່ງກ່າວ.

    ພິທີດັ່ງກ່າວຍັງໄດ້ມີການເຊັນສັນຍາ (Memorandum of Agreement -MOA) ໂຄງການພັດທະນາລາວແຊັດ ແລະ ລະບົບລະຫັດສຸຂະພາບ ແລະ ພິທີເຊັນບົດບັນທຶກຄວາມເຂົ້າໃຈ Memorandum of Understanding-MOU) ໃນການສຶກສາຄວາມເປັນໄປໄດ້ໃນການພັດທະນາ ສູນກາງການແລກປ່ຽນຂໍ້ມູນຂ່າວສານຂອງພາກລັດ ພາຍໃນປະເທດ (Government Data Exchange ຫຼື GDX) ລະຫວ່າງ ກະຊວງ ຕສ, ລົງນາມໂດຍ ທ່ານ ພູຂົງ ຈິດຮູບໂລກ, ຫົວໜ້າຫ້ອງການ, ກະຊວງ ຕສ ແລະ ບໍລິສັດ ສິຣິຈະເລີນໄຊ, ລົງນາມໂດຍ  ທ່ານ ສຸລິໄຊ ໄຊຍະສານ ຜູ້ອໍານວຍການໃຫຍ່ ບໍລິສັດ ສິຣິຈະເລີນໄຊ ຈຳກັດ, ພ້ອມດ້ວຍການນໍາທັງສອງພາກສ່ວນເຂົ້າຮ່ວມເປັນສັກຂີພະຍານ.

      ເພື່ອປະຕິບັດຕາມທິດທາງຫັນເປັນທັນສະໄໝຂອງລັດຖະບານ ໂຄງການພັດທະນາລະບົບແອັບ ລາວແຊັດ ແລະ ລະບົບລະຫັດສຸຂະພາບ Lao Green Code ແມ່ນໂຄງການຮ່ວມມືລະຫວ່າງ ກະຊວງເຕັກໂນໂລຊີ ແລະ ການສື່ສານ ແລະ ບໍລິສັດ ສິຣິຈະເລີນໄຊ ຕາມ MOU ສະບັບວັນທີ 27 ສີງຫາ 2021, ເຊີ່ງບໍລິສັດ ສາມາດພັດທະນາແອັບລາວແຊັດໄດ້ສຳເລັດຕາມຈຸດປະສົງ ແລະ ລະດັບຄາດໝາຍ, ເຊິ່ງໄດ້ມີການທົດລອງນຳໃຊ້ແອັບຕົວຈິງໃນຕົ້ນເດືອນ 02/2022 ທີ່ຜ່ານມານີ້.

      ແອັບລາວແຊັດ (LoudChat): ເປັນແອັບພິເຄຊັນສໍາລັບການຕິດຕໍ່ສື່ສານກັນ (Instant Messaging App) ແອັບທໍາອິດຂອງ ສປປ ລາວ ທີມີຟັງຊັນການເຮັດວຽກ ຄ້າຍຄືກັບ ແອັບອື່ນໆ ເປັນຕົ້ນ “Whatsapp”; “WeChat ທີ່ມີຟັງຊັນພື້ນຖານໃນການຮັບສົ່ງຂໍ້ຄວາມເປັນຕົວໜັງສື, ຂໍ້ຄວາມສຽງ, ຮູບພາບ ແລະ ວີດີໂອ, ສາມາດໂທດ້ວຍສຽງ, ໂທວີດີໂອ ແລະ ໂທສົນທະນາແບບເປັນກຸ່ມ, ສາມາດແບ່ງປັນເອກະສານ (File Sharing) ແລະ ສະຖານທີ່ຕັ້ງ (Share Location). ນອກນັ້ນ, ກໍຍັງມີລະບົບລະຫັດສຸຂະພາບ (Lao creen code): ເຊີ່ງເປັນ mini app ທີ່ນອນໃນ ແອັບ LoudChat ເຊີ່ງລະບົບດັ່ງກ່າວແມ່ນຖຶກນໍາໃຊ້ ເຂົ້າໃນວຽກງານຕ້ານ ແລະ ສະກັດກັ້ນ ການແຜ່ລະບາດຂອງພະຍາດ ໂຄວິດ 19 ຄ້າຍຄືກັບລະບົບທີ່ນຳໃຊ້ຢູ່ໃນຫຼາຍປະເທດເຊັ່ນ:​ ລະບົບ TraceTogether ຂອງປະເທດສີງກະໂປ ແລະ ລະບົບ Green Code ໃນແອັບ Wechat ຂອງ ສປ ຈີນ.  

      ໃນພິທີ ທ່ານ ພູຂົງ ຈິດຮູບໂລກ ຫົວໜ້າຫ້ອງການ, ກະຊວງ ຕສ ໄດ້ຂື້ນມີຄຳເຫັນຕໍ່ພິທີວ່າ: ວຽກງານການຫັນເປັນທັນສະໄໝ ແມ່ນວຽກງານໜຶ່ງທີ່ພັກ ແລະ ລັດຖະບານໃຫ້ຄວາມສຳຄັນ ແລະ ວຽກງານເຕັກໂນໂລຊີ ແລະ ການສື່ສານ ໄດ້ກາຍເປັນຂະແໜງການປາຍແຫຼມ ປີ່ນອ້ອມໃຫ້ແກ່ວຽກງານໃນທຸກຂະ       ແໜງການ, ເຊີ່ງສະແດງອອກໃນມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມຂອງສະພາແຫ່ງຊາດ ກໍ່ໄດ້ຮັບຮອງເອົາວິໄສທັດການພັດທະນາເສດຖະກິດດິຈິຕອນແຫ່ງຊາດໄລຍະ 20 ປີ, ຍຸດທະສາດການພັດທະນາ ເສດຖະກິດດິຈິຕອນ ແຫ່ງຊາດໄລຍະ 10 ປີ ແລະ ແຜນພັດທະນາເສດຖະກິດດິຈິຕອນແຫ່ງຊາດໄລຍະ 5  ປີ ຄັ້ງທີ 1.  ເຊິ່ງວຽກງານການພັດທະນາລະບົບພື້ນຖານໂຄງລ່າງ  ແລະ ການນຳໃຊ້ລະບົບດິຈິຕອນ ກໍ່ເປັນວຽກນື່ງນອນໃນ 8 ຍຸດທະສາດຂອງແຜນການພັດທະນາເສດຖະກິດດິຈິຕອນແຫ່ງຊາດໄລຍະ 10 ປີ.

ໄລຍະຜ່ານມາ ກະຊວງ ເຕັກໂນໂລຊີ ແລະ ການສື່ສານ ກໍ່ໄດ້ມີການຮ່ວມມືກັບຫຼາຍພາກສ່ວນເພື່ອຊຸກຍູ້ ສົ່ງເສີມ ການພັດທະນາວຽກງານດັ່ງກ່າວ ລວມທັງການຮ່ວມມືກັບບໍລິສັດສິຣິຈະເລີນໄຊ ຈຳກັດ ໃນການພັດທະນາ ແອັບພິເຄຊັນ ລາວແຊັດ ເຊິ່ງ ຖືໄດ້ວ່າເປັນວຽກບູລິມະສິດໜື່ງ ຂອງການຫັນເປັນທັນສະໄໝຂອງລັດຖະບານ ແລະ ການບໍລິການຂອງພາກລັດ ສູ່ສັງຄົມ ແລະ ປະຊາຊົນລາວ, ເຊິ່ງຈະສະແດງເຖິງລັກສະນະຊາດ ແລະ ການເພີ່ງຕົນເອງທາງດ້ານການພັດທະນາ ແລະ ບໍລິການ ລະບົບການຕິດຕໍ່ສື່ສານ ແລະ ແລກປ່ຽນຂໍ້ມູນກັນຂອງປະຊາຊົນລາວຜ່ານແອັບລາວແຊັດດັ່ງກ່າວ,  ເຊີ່ງນອກຈາກການນຳໃຊ້ໃນການສື່ສານ ແລະ ແລກປ່ຽນຂໍ້ມູນຂ່າວສານກັນແລ້ວ,  ຍັງສາມາດເຊື່ອມໂຍ່ງຂໍ້ມູນ ແລະ ການບໍລິການຂອງຂະແໜງການຕ່າງໆ ຂອງພາກລັດໃນອະນາຄົດ ເປັນຕົ້ນ ການເຂົ້າຫາລະບົບລະຫັດສຸຂະພາບ (Lao Green Code) ເຊິ່ງສາມາດເຊື່ອມໂຍ່ງຂໍ້ມູນຂະແໜງສາທາຜ່ານແອັບ LaoKYC, ການເສຍພາສີທີ່ດິນ,  ການຂື້ນທະບຽນແຮງງານຕ່າງດ້າວ,  ການຂົນສົ່ງ ແລະ ການບໍລິການອື່ນໆ.

       ນອກນັ້ນ, ທ່ານ ສຸລິໄຊ ໄຊຍະສານ ຜູ້ອໍານວຍການໃຫຍ່ ບໍລິສັດ ສິຣິຈະເລີນໄຊ ຍັງໄດ້ກ່າວໃຫ້ຮູ້ວ່າ: ແອັບ ລາວແຊັດ ຈະເປັນແອັບຕິດຕໍ່ສື່ສານທີ່ເປັນຂອງຄົນລາວເອງ ເພື່ອລຸດຜ່ອນ ການເພິ່ງພາ ການນໍາໃຊ້ແອັບຂອງຕ່າງປະເທດ ທີ່ມີຖານຂໍ້ມູນຢູ່ຕ່າງປະເທດ. ໃນອານາຄົດອັນໃກ້ນີ້ ບໍລິສັດ ຈະພັດທະນາ ແລະ ເພີ່ມການບໍລິການຕ່າງໆ ໃນແອັບລາວແຊັດໃຫ້ຫຼາຍຂື້ນ ເພື່ອອຳນວຍຄວາມສະດວກໃຫ້ແກ່ຜູ້ຊົມໃຊ້ ເປັນຕົ້ນແມ່ນ ການຈອງໂຮງແຮມ, ຮ້ານອາຫານ, ຈອງປີ້ລົດເມ-ປີ້ຍົນ, ລົງທະບຽນເພື່ອຮັບບັດແຮງງານ, ຊຳລະຄ່າສິນຄ້າ ແລະ ບໍລິການຕ່າງໆ ແລະ ບໍລິການອື່ນໆທີ່ຄົບຖ້ວນໃນແອັບດຽວ ໂດຍແນໃສ່ອຳນວຍຄວາມສະດວກໃຫ້ປະຊາຊົນສາມາດເຂົ້າເຖີງການບໍລິການຂອງພາກລັດໃຫ້ມີຄວາມວ່ອງໄວ ແລະ ທັນສະໄໝ. ບໍລິສັດມີຄວາມເຊື່ອໝັ້ນວ່າ ໃນອານາຄົດ ແອັບ ລາວແຊັດ ຂອງພວກເຮົາ ຈະສາມາດພັດທະນາ ທຽບເທົ່າກັບແອັບສາກົນ ທີ່ນໍາໃຊ້ໃນປະເທດອື່ນໆ ເຊັ່ນ: Whatsapp, Line, ຫຼື WeChat ເຊີ່ງຈະເປັນຄວາມພູມໃຈໜຶ່ງຂອງຄົນລາວ ໃນການພັດທະນາທາງດ້ານເຕັກໂນໂລຊີດີຈິຕອນຕາມທິດທາງຫັນເປັນທັນສະໄໝຂອງລັດຖະບານ.

ຂ່າວໂດຍ: ທ.ຊ່ອງດາວ  ພົມມະຈັນ

 

 

ວາ​ລະ​ສານ ໄອ​ຊີ​ທີ
ໜັງສືພິມ
ໜັງສືເຊີນເຂົ້າຮ່ວມປະມູນ ການຈັດຊື້ລະບົບຈັດເກັບ ແລະ ນໍາໃຊ້ເອກະສານຮ່ວມກັນພາກລັດ
ໜັງສືເຊີນເຂົ້າຮ່ວມປະມູນ ການຈັດຊື້ລະບົບ ສື່ສານພາກລັດ
ໜັງສືເຊີນເຂົ້າຮ່ວມການປະມູນ