2021/08/20 ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ສູນບໍລິຫານລັດດ້ວຍເອເລັກໂຕຣນິກ ແລະ ບໍລິສັດ ສະຕາໂທລະຄົມ ຈຳກັດ (UNITEL)

20/08/2021

 2021/08/20 ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ສູນບໍລິຫານລັດດ້ວຍເອເລັກໂຕຣນິກ ແລະ  ບໍລິສັດ ສະຕາໂທລະຄົມ ຈຳກັດ (UNITEL)

      ໃນຕອນບ່າຍ ຂອງວັນທີ 20 ສິງຫາ 2021 ທີ່ ສຳນັກງານໃຫຍ່ ບໍລິສັດ ສະຕາ ໂທລະຄົມ ຈຳກັດ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ສູນບໍລິຫານລັດດ້ວຍເອເລັກໂຕຣນິກ (ສລອ), ກະຊວງ ເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ ສະຕາ ໂທລະຄົມ ຈຳກັດ (UNITEL) ຂື້ນຢ່າງເປັນທາງການ.

     ໃຫ້ກຽດເຂົ້າຮ່ວມເປັນປະທານ ແລະ ສັກຂີພະຍານ ໂດຍ ທ່ານ ບັນດິດ ສາດສະດາຈານ ປະລິນຍາເອກ ບໍ່ວຽງຄຳ ວົງດາລາ ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ທ່ານ ລີວ ແມ໋ງ ຮ່າ (Mr. Luu Manh Ha) ອຳນວຍການໃຫຍ່ ບໍລິສັດ ສະຕາ ໂທລະຄົມ ຈຳກັດ, ບັນດາທ່ານ ຫົວໜ້າ ແລະ ຮອງຫົວໜ້າກົມ/ທຽບເທົ່າ ອ້ອມຂ້າງ ກະຊວງ ຕສ ແລະ ຄະນະຜູ້ອຳນວຍການ ບໍລິສັດສະຕາ ໂທລະຄົມ ຈຳກັດ.

          ເປັນກຽດຕາງໜ້າລົງນາມໃນພິທີເຊັນບົດບັນທຶກຄວາມເຂົ້າໃຈຂອງສອງຝ່າຍໃນຄັ້ງນີ້ໂດຍ: ທ່ານ ປະລິນຍາເອກ ທະວີສັກ ມະໂນທັມ, ຫົວໜ້າສູນບໍລິຫານລັດດ້ວຍເອເລັກໂຕນິກ, ກະຊວງ ເຕັກໂນໂລຊີ ແລະ ການສື່ສານ ແລະ ທ່ານ ບຸນມີ ມາລາວົງ, ຮອງຜູ້ອຳນວຍການໃຫຍ່ ບໍລິສັດ ສະຕາ ໂທລະຄົມ ຈຳກັດ ເພື່ອຕົກລົງຮ່ວມມືກັນ ສຶກສາຄົ້ນຄວ້າການຫັນເປັນລັດຖະບານດິຈິຕອນ ແລະ ປັບປຸງຟອນພາສາລາວ ໃຫ້ສົມບູນຮອງຮັບການບໍລິການຕ່າງໆທີ່ຫັນເປັນທັນສະໄໝ ໂດຍສະເພາະຂອງລະບົບບໍລິຫານລັດດ້ວຍເອເລັກໂຕຣນິກ ເປັນຕົ້ນແມ່ນ ການຄົ້ນຄວ້າພັດທະນາ ມາດຕະຖານລະບົບ Software/Program, Application ເພື່ອໃຫ້ບໍລິການທັງພາກລັດ, ຫົວໜ່ວຍທຸລະກິດ ແລະ ປະຊາຊົນທົ່ວປວງຊົນ.

 

     ພ້ອມນີ້, ຍັງຈະໄດ້ສຶກສາຄົ້ນຄວ້າ ການພັດທະນາ ລະບົບທຸລະກຳ ແລະ ການຄ້າທາງເອເລັກໂຕຣນິກ (Digital Payment and Commerce Platform) ເພື່ອເຊື່ອມໂຍງກັບລະບົບລັດຖະບານດິຈິຕອນ ແລະ ລະບົບລາຍເຊັນເອເລັກໂຕຣນິກ (e-Signature Platform) ເພື່ອສົ່ງເສີມການບໍລິຫານ ແລະ ບໍລິການລັດ ໃຫ້ທັນສະໄໝ ແລະ ຍັງຈະໄດ້ສຸມໃສ່ການຍົກລະດັບຄວາມຮູ້ຂອງພະນັກງານ ລັດຖະກອນ ທາງດ້ານເຕັກໂນໂລຊີດິຈິຕອນ ແລະ ອື່ນໆ ເພື່ອຮອງຮັບໃຫ້ກັບວຽກງານ ການຫັນເປັນລັດຖະບານດິຈິຕອນ ຂອງ ສປປ ລາວ ໂດຍໃຫ້ສອດຄ່ອງກັບແຜນພັດທະນາການຫັນເປັນລັດຖະບານດິຈີຕອນໃນປັດຈຸບັນ.

ຂ່າວໂດຍ:ສູນບໍລິຫານລັດດ້ວຍເອເລັກໂຕນິກ

 

 

ວາ​ລະ​ສານ ໄອ​ຊີ​ທີ
ໜັງສືພິມ
ສະຖິຕິ
ວິໃສທັດ,ແຜນຍຸດທະສາດ