2020/09/03ສູນ ບໍລິຫານລັດດ້ວຍເອເລັກໂຕຮນິກ ຈັດກອງປະຊຸມສຳມະນາ ໃຫ້ຄະນະໂຄສະນາອົບຮົມສູນກາງພັກ ກ່ຽວກັບ ລະບົບບໍລິຫານລັດດ້ວຍເອເລັກໂຕຣນິກ ແລະ ການຫັນເປັນທັນສະໄໝຂອງລັດຖະບານ

03/09/2020

2020/09/03ສູນ ບໍລິຫານລັດດ້ວຍເອເລັກໂຕຮນິກ ຈັດກອງປະຊຸມສຳມະນາ ໃຫ້ຄະນະໂຄສະນາອົບຮົມສູນກາງພັກ ກ່ຽວກັບ ລະບົບບໍລິຫານລັດດ້ວຍເອເລັກໂຕຣນິກ ແລະ ການຫັນເປັນທັນສະໄໝຂອງລັດຖະບານ

          ໃນວັນທີ 03 ກັນຍາ 2020, ໄດ້ມີກອງປະຊຸມສຳມະນາໃຫ້ຄວາມຮູ້ກ່ຽວກັບລະບົບບໍລິຫານລັດດ້ວຍເອເລັກໂຕຣນິກ ແລະ ການຫັນເປັນທັນສະໄໝຂອງລັດຖະບານ ທີ່ຫ້ອງປະຊຸມຄະນະໂຄສະນາອົບຮົມສູນກາງພັກ ໂດຍການເປັນປະທານຮ່ວມຂອງ ທ່ານ ນາງ ສົມພອຍ ພົມມະຈັກ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ທ່ານ ປະລິນຍາເອກ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ ໂທລະຄົມມະນາຄົມ ແລະ ການສື່ສານ. ມີບັນດາຄະນະກົມ/ທຽບເທົ່າ, ຄະນະພະແນກ ແລະ ວິຊາການ ພາຍໃນຄະນະໂຄສະນາອົບຮົມສູນກາງພັກ ເຂົ້າຮ່ວມທັງໝົດ ຈຳນວນ 123 ທ່ານ ເປັນຍິງ 63 ທ່ານ.

       ຈຸດປະສົງໃນການຈັດກອງປະຊຸມສຳມະນາ ໃນຄັ້ງນີ້ ແມ່ນເພື່ອເຜີຍແຜ່, ແລກປ່ຽນບົດຮຽນ ແລະ ປະສົບການ ກ່ຽວກັບການພັດທະນາລະບົບບໍລິຫານລັດດ້ວຍເອເລັກໂຕຣນິກ ເປັນຕົ້ນ: ລະບົບຫ້ອງການທັນສະໄໝ (e-office), ລະບົບກອງປະຊຸມທາງໄກ, ລະບົບອີເມວ, G-Chat, G-Share, ລະບົບ Microsoft teams ແລະ ລະບົບເຄືອຂ່າຍພາກລັດ ແລະ ການຫັນເປັນທັນສະໄໝຂອງລັດຖະບານ ໃຫ້ກັບພະນັກງານທົ່ວຄະນະໂຄສະນາອົບຮົມສູນກາງພັກ ຮັບຮູ້, ເຂົ້າໃຈ ແລະ ສາມາດນຳໃຊ້ລະບົບດັ່ງກ່າວ ເຂົ້າຊ່ວຍໃນວຽກງານຂອງຕົນເອງໃນການຫັນເປັນທັນສະໄໝເທື່ອລະກ້າວ. ຊຶ່ງໃນປັດຈຸບັນເຕັກໂນໂລຊີ ແມ່ນໄດ້ມີການພັດທະນາຢ່າງວ່ອງໄວ ແລະ ເປັນກຸນແຈສຳຄັນໃນການຂັບເຄື່ອນເສດຖະກິດຂອງຊາດໃຫ້ມີການພັດທະນາແບບກ້າວກະໂດດ.

     ໃນການບັນລະຍາຍຄັ້ງນີ້, ທ່ານ ນາງສົມພອຍ ພົມມະຈັກ ໄດ້ສະເໜີກ່ຽວກັບຄວາມສຳຄັນ ແລະ ຈຳເປັນ ຂອງຄະນະໂຄສະນາອົບຮົມສູນກາງພັກ ທີ່ຈະຕ້ອງໄດ້ຫັນເປັນທັນສະໄໝ ເພື່ອເປັນກະບອກສຽງຂອງພັກ ນຳພາປວງຊົນທັງຊາດ ຫັນ ສປປ ລາວ ເປັນທັນສະໄໝ. ພ້ອມນັ້ນ, ທ່ານ ປະລິນຍາເອກ ທະວີສັກ ມະໂນທັມ ໄດ້ນຳສະເໜີ ກ່ຽວກັບສະພາບການພັດທະນາ ແລະ ຫັນເປັນດິຈິຕອນ ຂອງສາກົນ, ພາກພື້ນ ແລະ ໃນ ສປປ ລາວ, ພ້ອມທັງໄດ້ຍົກໃຫ້ເຫັນເຖິງຄວາມສຳຄັນ ແລະ ຈຳເປັນໃນການນຳໃຊ້ບັນດາລະບົບບໍລິຫານລັດດ້ວຍເອເລັກໂຕຣນິກ ເຂົ້າໃນວຽກງານ ພັກ-ລັດ ກໍ່ຄືຂອງຄະນະໂຄສະນາອົບຮົມສູນກາງພັກ ເພື່ຶອເປັນເງື່ອນໄຂອຳນວຍຄວາມສະດວກໃນການຊຸກຍູ້ ແລະ ສົ່ງເສີມ ວຽກງານໂຄສະນາໃຫ້ມີຄວາມທັນສະໄໝ, ວ່ອງໄວ ແລະ ມີປະສິດທິພາບ.

     ໃນຕອນທ້າຍ, ທ່ານ ປະລິນຍາເອກ ທະວີສັກ ມະໂນທັມ ຍັງໄດ້ເນັ້ນ ແລະ ຍົກໃຫ້ເຫັນຄວາມສຳຄັນ ໃນການພັດທະນາພຶ້ນຖານໂຄງລ່າງ ການເຊື່ອມຕໍ່ເຄືອຂ່າຍພາກລັດ ເພື່ອໃຫ້ບັນດາກະຊວງ, ອົງການຈັດຕັ້ງພັກ-ລັດ ຂັ້ນສູນກາງ ແລະ ທ້ອງຖິ່ນ ໃຫ້ສາມາດເຊື່ອມໂຍງຫາກັນໄດ້ ເພື່ອເປັນເງື່ອນໄຂອຳນວຍຄວາມສະດວກໃນການຕິດຕໍ່-ພົວພັນວຽກງານ, ແລກປ່ຽນຂໍ້ມູນເຊິ່ງກັນແລະກັນ ແລະ ສາມາດເຂົ້າເຖິງການບໍລິການຕ່າງໆ ຂອງລະບົບບໍລິຫານລັດໄດ້ຢ່າງສະດວກ, ວ່ອງໄວ ແລະ ມີຄວາມປອດໄພ.

 

ວາ​ລະ​ສານ ໄອ​ຊີ​ທີ
ໜັງສືພິມ
ສະຖິຕິ
ວິໃສທັດ,ແຜນຍຸດທະສາດ