ກອງປະຊຸມສຳມະນາເຜີຍແຜ່ ກ່ຽວກັບລະບົບ ຫ້ອງການທັນສະໄໝ (e-Office) ໃຫ້ແກ່ຫ້ອງວ່າການສໍານັກງານນາຍົກລັດຖະມົນຕີ

13/02/2020

ກອງປະຊຸມສຳມະນາເຜີຍແຜ່ ກ່ຽວກັບລະບົບ ຫ້ອງການທັນສະໄໝ (e-Office) ໃຫ້ແກ່ຫ້ອງວ່າການສໍານັກງານນາຍົກລັດຖະມົນຕີ

ໃນຕອນເຊົ້າ ຂອງວັນທີ 04 ກຸມພາ 2020 ທີ່ຫ້ອງປະຊຸມໃຫຍ່ ຫ້ອງວ່າການສໍານັກງານນາຍົກລັດຖະມົນຕີ ໄດ້ຈັດກອງປະຊຸມ ສໍາມະນາເຜີຍແຜ່ລະບົບກອງການທັນສະໄໝ ຂື້ນໂດຍການເປັນປະທານຂອງ ທ່ານ ປອ ເພັດ ພົົມພິພັກ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແລະ ນໍາສະເໜີເຜີຍແຜ່ຈາກສູນບໍລິຫານລັດດ້ວຍເອເລັກໂຕຣນິກ (ສລອ), ກະຊວງ ໄປສະນີໂທລະຄົມມະນາຄົມ ແລະ ການສື່ສານ ນໍາພາທີມງານໂດຍ ທ່ານ ປອ ທະວີສັກ ມະໂນທັມ ຫົວໜ້າ ສລອ ເຊີ່ງມີຄະນະກົມ/ທຽບເທົ່າ, ຄະນະພະແນກ ແລະ ວິຊາການ ຈາກບັນດາກົມ/ທຽບເທົ່າພາຍໃນ ສຳນັກງານນາຍຍົກລັດຖະມົນຕີ ເຂົ້າຮ່ວມ ຈຳນວນ 177 ທ່ານ.

 

ການພັດທະນາລະບົບບໍລິຫານລັດດ້ວຍເອເລັກໂຕຣນິກ   ແມ່ນວຽກງານໜຶ່ງທີ່ສໍາຄັນ ແລະ ຈໍາເປັນ ໃນການຊຸກຍູ້ ແລະ ສົ່ງເສີມໃຫ້ແກ່ວຽກງານຂອງທຸກຂະແໜງການທັງພາກລັດ, ພາກທຸລະກິດ ແລະ ເອກະຊົນ ເພື່ອໃຫ້ມີຄວາມວ່ອງໄວ, ໂປ່ງໃສ, ມີປະສິດທິພາບ ແລະ ປະຫຍັດ ແນໃສ່ການຫັນເປັນລັດຖະບານດິຈິຕອນ ແລະ ທັນສະໄໝ ເທື່ອລະກ້າວ.

ຈຸດປະສົງຂອງກອງປະຊຸມສຳມະນາເຜີຍແຜ່ໃນຄັ້ງນີ້ ແມ່ນເພື່ອເຜີຍແຜ່, ແລກປ່ຽນຄວາມຮູ້ ແລະ ປະສົບການ ກ່ຽວກັບການນຳໃຊ້ລະບົບບໍລິຫານລັດດ້ວຍເອເລັກໂຕຣນິກ ໂດຍສະເພາະແມ່ນບັນດາລະບົບ ຫ້ອງການທັນສະໄໝ     ( e-Office), ຈົດໝາຍເອເລັກໂຕຣນິກ (e-Mail), ລະບົບກອງປະຊຸມທາງໄກ (Video Conference) ແລະ ລະບົບສົນທະນາພາກລັດ (G-Chat) ລວມເຖິງການປະກອບຄຳຄິດຄຳເຫັນຕໍ່ກັບວຽກງານການພັດທະນາລະບົບບໍລິຫານລັດດ້ວຍເອເລັກໂຕຣນິກ ເຂົ້າໃນທຸກຂະແໜງການ ເພື່ອໃຫ້ຜູ້ເຂົ້າຮ່ວມກອງປະຊຸມທີ່ມາຈາກບັນດາກົມ/ທຽບເທົ່າຂອງ ຫສນຍ ໄດ້ຮັບຮູ້ເຂົ້າໃຈ ເອົາໄປນຳໃຊ້ເຂົ້າໃນວຽກງານຕົວຈິງຂອງຕົນໃຫ້ຖືກຕາມເປົ້າໝາຍ ແລະ ເກີດປະໂຫຍດສູງສຸດ. ພ້ອມກັນນັ້ນ, ກໍ່ຍັງໄດ້ມີການຕັ້ງຄໍາຖາມ-ຕອບ ປຶກສາຫາແລກປ່ຽນ ຄໍາຄິດຄໍາເຫັນ ບັນຫາຕ່າງໆ ໃນການພັດທະນາ, ນໍາໃຊ້ລະບົບທັນສະໄໝ ແລະ ການເຊື່ອມໂຍງລະບົບບໍລິຫານລັດດ້ວຍເອເລັກໂຕຣນິກ ເຂົ້າໃນທຸກຂະແໜງການ ໃຫ້ມີການຊົມໃຊ້ຢ່າງກ້ວາງຂວາງ ແລະ ມີປະສິດທິຜົນສູງສຸດ.

ນອກຈາກການສຳມະນາເຜີຍແຜ່ແລ້ວ, ຍັງໄດ້ຝຶກອົບຮົມການນຳໃຊ້ ລະບົບ e-Office ໃຫ້ພະນັກງານ ຫສນຍ ເພື່ອເລີ່ມນຳໃຊ້ລະບົບດັ່ງກ່າວ ຢ່າງເຕັມຮູບແບບ ເພື່ອຫັນເປັນທັນສະໄໝ ເທື່ອລະກ້າວ. ກະຊວງ ປທສ ໄດ້ສຳເລັດການຕິດຕັ້ງ ລະບົບ e-Office ໃຫ້ ຫສນຍ ໃນທ້າຍປີຜ່ານມາ, ຊຶ່ງລະບົບແມ່ນຈະອຳນວຍຄວາມສະດວກໃຫ້ແກ່ ຫສນຍ ໃນການຄຸ້ມຄອງ, ຈັດເກັບ ແລະ ຕິດຕາມການຈໍລະຈອນ ເອກະສານເຂົ້າ-ອອກ ຂອງຫ້ອງການ ທີ່ສາມາດເຮັດການສະຫຼຸບ ລາຍງານ ແລະ ຄົ້ນຫາເອກະສານຢ່າງສະດວກສະບາຍ, ວ່ອງໄວ ແລະ ປະຫຍັດເວລາໃນການປະຕິບັດວຽກງານ, ຊື່ງນັກສຳມະນາກອນກໍ່ໄດ້ໃຫ້ຄວາມສົນໃຈ ແລະ ມີຄຳຖາມເຈາະຈີ້ມຕໍ່ການນຳໃຊ້ລະບົບດັ່ງກ່າວ ເພື່ອນຳເອົາໄປໜູນໃຊ້ເຂົ້າໃນການບໍລິຫານວຽກງານຂອງຕົນຢ່າງມີປະສິດທິພາບ.

 

ວາ​ລະ​ສານ ໄອ​ຊີ​ທີ
ສະຖິຕິ
ວິໃສທັດ,ແຜນຍຸດທະສາດ