2020/01/09 ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ເປີດການນຳໃຊ້ລະບົບເວັບໄຊຂອງພາກລັດ(Government Web Platform).

09/01/2020

2020/01/09 ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ເປີດການນຳໃຊ້ລະບົບເວັບໄຊຂອງພາກລັດ(Government Web Platform).

     ໃນຕອນເຊົ້າຂອງ ວັນທີ 09 ມັງກອນ 2020, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ຮ່ວມກັບບໍລິສັດ ໄຊເບີເຣຍ ໄດ້ຈັດພິທີເປີດການນຳໃຊ້ລະບົບເວັບໄຊຂອງພາກລັດ ຫຼື Government Web Platform ຂື້ນທີ່ ໂຮງແຮມ ຄຣາວພຣາຊາ, ນະຄອນຫຼວງວຽງຈັນ. ເຊິ່ງໄດ້ຮັບກຽດເປັນປະທານເປີດງານ ໂດຍ ທ່ານ ບຸນສະເຫຼີມໄຊ ເຄນນະວົງ ຮອງລັດຖະມົນຕີ ກະຊວງ ໄປສະນີ,ໂທລະຄົມມະນາຄົມ ແລະ ການສື່ສານ, ມີຄະນະຜູ້ບໍລິຫານຈາກບໍລິສັດ ໄຊເບີເຣຍ, ຄະນະກົມ/ທຽບເທົ່າ, ບັນດາກະຊວງ ,ຫ້ອງການລັດ, ບໍລິສັດ ໂທລະຄົມ ແລະ ສະຖາບັນການສືກສາຕ່າງໆ ເຂົ້າຮ່ວມຫຼາຍກວ່າ 50 ທ່ານ.

   ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ໃນນາມເປັນຜູ້ຄຸ້ມຄອງມະຫາພາກ ດ້ານວຽກງານຫັນໃຫ້ເປັນທັນສະໄໝ ແລະ ດິຈິຕອນຂອງລັດຖະບານ, ໄດ້ສ້າງແຜນຮ່ວມມືກັບ ບໍລິສັດ ໄຊເບີເຣຍ ໃນປີ 2018 ໂດຍຈຸດປະສົງແມ່ນເພື່ອພັດທະນາລະບົບເວັບໄຊຂອງພາກລັດ ແລະ ສ້າງເປັນລະບົບໂຕແບບຂອງການນຳໃຊ້ຂອງບັນດາກະຊວງ ແລະ ຫ້ອງການລັດຕ່າງໆ. ເຊິ່ງໝາກຜົນຂອງການຮ່ວມມືຂອງທັງສອງຝ່າຍແມ່ນໄດ້ ສຳເລັດການພັດທະນາລະບົບເວັບໄຊພາກລັດ (Government Web Platform ຫຼື G-Web) ເຊິ່ງລວມມີລາຍລະອຽດຕ່າງໆຄື:

ມາດຕະຖານໂຄງສ້າງ ຂອງ G-Web ແມ່ນ ມີມາດຕະຖານອັນດຽວກັນ, ເຊິ່ງເວັບໄຊພາກລັດໃດນື່ງຄວນມີຄື:

  • ໜ້າຫຼັກ: ເພື່ອເປັນບ່ອນເຂົ້າຫາ ຂໍ້ມູນໃນໝວດຕ່າງໆ ເຊັ່ນ: ຂ່າວການເຄື່ອນໄຫວຕ່າງໆ, ການບໍລິການ, ເອກະສານເຜີຍແຜ່ ແລະ ອື່ນໆ.
  • ການເຄື່ອນໄຫວ: ເພື່ອສະແດງຂ່າວ ແລະ ເຫດການຕ່າງໆ ຂອງບັນດາກະຊວງ ແລະ ຫ້ອງການລັດ.
  • ເອກະສານເຜີຍແຜ່: ລວມມີ ກົດໝາຍ, ແຈ້ງການ, ຂໍ້ຕົກລົງ, ເອກະສານກອງປະຊຸມປະຈຳປີ, ແລະ ເອກະສານເຜີຍແຜ່ອື່ນໆ ທີ່ຕິດພັນກັບກະຊວງ ຫຼື ອົງການຈັດຕັ້ງລັດໃດໜື່ງ ທີ່ອາດເປັນຂໍ້ມູນ ແລະ ຜົນປະໂຫຍດ.
  • ຄັງຄວາມຮູ້: ລວມມີຄວາມຮູ້ທົ່ວໄປ ແລະ ບົດນຳສະເໜີ ຕ່າງໆ ທັງຈາກພາຍໃນ ແລະ ຕ່າງປະເທດ ເພື່ອສ້າງເປັນແຫຼ່ງຄວາມຮູ້ໃຫ້ແກ່ພະນັກງານ ແລະ ລັດຖະກອນ.
  • ການບໍລິການ: ເພື່ອເຂົ້າຫາການບໍລິການຂອງ ຫຼື ທີ່ຕິດພັນກັບກະຊວງ ຂອງຕົນເປັນຕົ້ນ ການບໍລິການຂໍຈົດທະບຽນການສ້າງຕັ້ງບໍລິສັດ ໄອຊີທີ, ການຂໍຈົດທະບຽນລະຫັດຊື່ ໂດເມນເນມ, ການບໍລິການລະບົບອີເມວຂອງພາກລັດ ແລະ ອື່ນໆ.
  • ຮັບແຈ້ງຄຳຕິຊົມ: ເພື່ອເປັນບ່ອນຮັບຄຳຕຳນິຕິຊົມຈາກຜູ້ຊົມໃຊ້ບໍ່ວ່າຈະເປັນຕໍ່ກັບເວັບໄຊ ຫຼື ຕໍ່ກັບການບໍລິການຂອງກະຊວງ.
  • ກ່ຽວກັບອົງກອນ: ເພື່ອສະແດງ ແລະ ເຜີຍແຜ່ຂໍ້ມູນກ່ຽວກັບອົງກອນເຊັ່ນ: ພາລະບົດບາດ, ໂຄງຮ່າງການຈັດຕັ້ງ, ການຮ່ວມມືສາກົນ ແລະ ອື່ນໆ.
  •    ເຊື່ອມໂຍງເວັບໄຊທ໌: ເພື່ອໃຫ້ສາມາດກົດເຂົ້າຫາເວັບໄຊຂອງພາກສ່ວນຕ່າງໆ ໄດ້.

ຄວາມສາມາດຂອງລະບົບ ເວັບໄຊ

  • G-Web ສາມາດບໍລິຫານ ແລະ ສະແດງຂໍ້ມູນ ໄດ້ ທັງພາສາລາວ ແລະ ອັງກິດ, ຊຶ່ງການປ່ຽນພາສາ ແມ່ນສາມາດເຮັດໄດ້ໃນລະດັບໜ້າເວັບໃດໜຶ່ງໄດ້ເລີຍ.
  • ຜູ້ຊົມໃຊ້ສາມາດ ຄົ້ນຫາໂດຍໃຊ້ keyword ເພື່ອຊອກຫາ ຂໍ້ມູນ ທີ່ກ່ຽວຂ້ອງກັບ keyword ນັ້ນ
  • ຂໍ້ມູນຂອງເວັບໄຊທ໌ ສາມາດເບິ່ງໄດ້ຜ່ານ ໂປຣແກຣມເບິ່ງໜ້າເວັບ ທັງໃນໜ້າຈໍຄອມພິວເຕີທົ່ວໄປ ແລະ ໃນອຸປະກອນມືຖື
  • ການບໍລິຫານຂໍ້ມູນເບື້ອງຫຼັງ, ຜູ້ຄຸ້ມຄອງລະບົບ ຕ້ອງໄດ້ ລັອກອິນກ່ອນ ແລະ ນຳໃຊ້ເມນູຕ່າງໆ ໄດ້ຢ່າງງ່າຍດາຍ
  • ນຳໃຊ້ເຄື່ອງມືບໍລິຫານເນື້ອໃນ ຫຼື ເອີ້ນອີກຢ່າງໜຶ່ງວ່າ CMS, ຫຼັກໆແລ້ວ ຜູ້ຄຸ້ມຄອງລະບົບ ສາມາດ: ບໍລິຫານຜູ້ໃຊ້ ແລະ ສິດຕ່າງໆ,ບໍລິຫານເມນູ ບໍ່ວ່າຈະປັບປ່ຽນ ຫຼື ເພີ່ມເມນູ,ບໍລິຫານປະເພດ ແລະ ເນື້ອໃນຂອງຂໍ້ມູນ,ບໍລິຫານເອກະສານເຜີຍແຜ່ປະເພດຕ່າງໆ,ບໍລິຫານຄັງຄວາມຮູ້,ບໍລິຫານແບນເນີ້ ໃນໜ້າຫຼັກ ພ້ອມທັງປ່ຽນສີ ຕ່າງໆ ເພື່ອຄວາມເປັນເອກະລັກສະເພາະຂອງອົງກອນ ແລະ ເບິ່ງສະຖິຕິການເຂົ້າຊົມເວັບໄຊທ໌ ແບບຫຍໍ້ໆໄດ້.

 

        ລະບົບເວັບໄຊພາກລັດ ປະຈຸບັນແມ່ນຖືກນຳໃຊ້ ເພື່ອພັດທະນາເວັບໄຊ ຂອງ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ www.mpt.gov.la ແລະ ເວັບໄຊຂອງສູນບໍລິຫານລັດດ້ວຍເອເລັກໂຕຣນິກ www.egc.gov.la ແລະ ປະກອບມີບັນດາຂໍ້ມູນຂ່າວສານຕ່າງໆ ສະເພາະຂອງກະຊວງ ປທສ ແລະ ສູນບໍລິຫານລັດດ້ວຍເອເລັກໂຕຣນິກ. ສຳລັບແຜນການ ໃນຕໍ່ໜ້າຂອງ ກະຊວງ ປທສ ແມ່ນການຂະຫຍາຍການນຳໃຊ້ ລະບົບເວັບໄຊພາກລັດ ໄປຫາບັນດາພະແນກການຂອງຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ທັງສູນກາງ ແລະ ທ້ອງຖິ່ນ ແນໃສ່ການ ສ້າງໄດ້ຕົວແບບຂອງການສ້າງເວັບໄຊ ໃຫ້ແກ່ບັນດາກະຊວງ ແລະ ຫ້ອງການລັດຕ່າງໆ ພ້ອມທັງກຽມຄວາມພ້ອມຂອງການຂະຫຍາຍ ແລະ ຊຸກຍູ້ໃຫ້ມີການຊົມໃຊ້ລະບົບດັ່ງກ່າວ ໃຫ້ແຜ່ຫຼາຍໃນຕໍ່ໜ້າ.

          

 

ວາ​ລະ​ສານ ໄອ​ຊີ​ທີ
ສະຖິຕິ
ວິໃສທັດ,ແຜນຍຸດທະສາດ